Hijab-e-Shab

خزاں رخصت ہو رہی ہو ۔۔۔ شجر پتّوں سے خالی ۔۔۔ تھم تھم کے چلتی ہوا میں خشک پتّوں کی خوشبو بسی ہو ۔۔۔ آنگن بادام کے سرخ پتوں سے بھرا ہو اور بقول ناصر کاظمی پتّوں کی پازیب بج رہی ہو ، ایسے میں آسمان سُرمئی بادلوں سے بھر جائے اور ابرِ رحمت برسنے لگے ۔۔۔۔ کل صبح چار بجے ایسا ہی حسین منظر تھا ۔۔۔۔۔
خشک پتّوں پہ گِرتی بوندوں کا حسین ساز ۔۔۔۔ مٹی کی دلفریب خوشبو ۔۔۔۔ بھیگے پیڑ پودے ۔۔ رات کی خاموشی ۔۔۔ پل بھر کو زندگی بہت خوبصورت لگی ۔۔ دل نے چاہا وقت ٹھہر جائے اور میں اس منظر میں گُم ہوجاؤں ۔۔۔
سہانے موسم کے مزے لے کر جب میری صبح ہوئی موسم کی بے خودی کا خمار اتر چکا تھا ۔۔۔۔ بلاگ پوسٹ صبح پانچ بجے لکھ کر موبائل فولڈر میں محفوظ ہوچکی تھی ۔۔۔۔ خیال صرف یہ تھا کہ جھاڑو اور وائپر میرا منتظر ہے ۔۔۔۔
مورل : کوئی بھی کلر فُل شو مُفتا نہیں ہوتا قیمیت ادا کرنی پڑتی ہے

ابھی تو سال شروع ہوا تھا ابھی ختم ۔۔۔ اس گھسے پٹے جملے پہ کیا لکھنا سب کو پتہ ہے دن مہینے سال تیزی سے گزرتے چلے جاتے ہیں ۔۔۔۔ 2011 کا جائزہ اپنے حوالے سے لوں تو زندگی میں پہلی بار ہاسپٹل ایڈمٹ ہوئی ۔۔۔۔ فیس بُک استعمال کرنا شروع کیا ۔۔۔۔ بہت سے نئے لوگوں سے جان پہچان ہوئی ۔۔۔ کچھ بہت پرانے شناساؤں کو بائے بائے فور ایور کہا ۔۔۔۔
پریشانیاں زندگی کا حصّہ ہیں ساتھ رہیں لیکن موسموں کا حُسن دل کو بھاتا رہا ۔۔۔۔۔۔ تخریبی خیالات ۔۔۔ پُر تشدد سوچیں ذہن میں کلبلاتی رہیں ۔۔۔۔۔ ہاتھوں کو تھپڑ مارنے کی حسرت رہی لیکن وہ چہرے دور تھے ۔۔۔۔۔۔۔
ٹھرکیوں نے اس سال بہت دماغ خراب کیا ۔۔۔۔۔۔ بری طرح نظر انداز کرنے پہ بھی اُن کی ڈھٹائی عروج پہ رہی ظاہر ہے ٹھرکی جو ہوئے ۔۔۔۔ بلاگی دنیا پہ نظر ڈالی جائے تو آدھے سال گرما گرمی رہی پھر خاموشی چھا گئی ۔۔۔۔۔۔۔ لیکن سال کے آخر میں وہ ہوا جس کی اُمید نہ تھی ۔۔۔۔۔۔۔ لیکن معجزے تو ہوتے ہیں ناں
پرانے کلینڈر کی جگہ نیا کلینڈر لے گا ہندسے بدلیں گے اور نیا سال آ جائے گا ۔۔۔۔۔۔۔ وہی زندگی ، خواہشیں ، اُمیدیں ہونگی ۔۔۔۔۔۔ لیکن اس یقین کے ساتھ کہ شائد اب کے برس اللہ ہم گناہ گاروں پہ اپنا کرم فرمائے ۔۔۔۔ پاکستان کے حالات بہتر ہوں تاکہ زندگی آسان ہوجائے ۔۔۔۔۔
اللہ تعالیٰ سے دعا ہے نیا سال ہم سب کے لیے خوشیاں لائے آمین ۔۔۔

یہ عنوان سعداللہ شاہ کے مجموعے کا ہے ۔۔۔ سعد اللہ کی زندگی میں کوئی کمی رہی ہوگی انہوں نے اشعار لکھ ڈالے ۔۔۔۔۔ کل مجھے جھاڑو دیتے ہوئے خیال آیا 10 دن ہونے والے ہیں کچھ نہیں لکھا ۔۔۔۔۔۔ یوں محسوس ہوا جیسے کچھ کمی سی رہ گئی اور اس حوالے سے مجھے سعد اللہ شاہ یاد آگئے ۔۔۔۔
بلاگرز کے انٹرویو میں شائد منظر نامہ میں پڑھا تھا بلاگنگ عادت بن جاتی ہے ، نشہ ہے ایک طرح کا ۔۔۔۔ اس وقت میں نے دھکّا سٹارٹ بلاگ لکھنا شروع کیا تھا ۔۔۔۔ عادت ، نشہ جیسی بات پڑھ کے سوچا تھا ایویں فضول کی باتیں سب ۔۔۔۔۔ لیکن کل میری سوچ غلط ثابت ہوئی ۔۔۔ بلاگ پہ کچھ نا کچھ لکھتے رہنا عادت بن گئی ہے ۔۔۔۔ کچھ عنوانات ذہن میں تھے لیکن مصروفیت کچھ ایسی رہی اور ہے کہ سب گڈ مڈ ہوکے گڑ بڑ گُھٹالا بن گیا ۔۔۔۔۔ کل بہت سوچنے کے بعد ایک عنوان یاد آیا کہ لکھنا کیا تھا ۔۔۔۔۔ وہ پھر سہی فی الحال تو دسمبر کے دس دن باقی ہیں ۔۔۔۔ دسمبر کی دھوپ میں بیٹھنے کا شوق تو پورا کر لیا لیکن وہ اون کا گولا جو بڑے چاؤ سے منگوایا تھا الماری میں پڑا یقیناً افسردہ ہوگا کہ میرے ہاتھ پہ الجھ کے لپٹ کے ایک حسین شاہکار بننے سے رہ گیا
کل رات سے ٹھنڈی ہوائیں چل رہی ہیں دسمبر خوبصورت لگ رہا تھا ۔۔۔ دل چاہا ابرار کا بھیگا بھیگا دسمبر سنوں یا عامر سلیم کا سہانی شام ، ساتھ کافی کے مزے لوں ۔۔۔۔
لیکن آج دسمبر گیا بھاڑ میں ۔۔۔۔۔ دل چاہا پتھراؤ شروع کردوں پتھراؤ تو نہیں کیا لیکن جو چیز بے جگہ نظر آئی اس کو ٹھکانے لگایا ۔۔۔۔۔ دو چمچے پھینکے جو بعد میں خود میں نے اٹھائے ۔۔۔۔۔۔۔
وجہ ۔۔۔۔۔۔ گیس پریشر کی کمی ۔۔۔۔۔۔۔۔۔ روٹی کی جگہ پاپڑ بنائے ۔۔۔۔ کھچڑی بنانے کی کوشش کی لیکن آنچ کم ہونے کی وجہ سے دال گلنے سے انکار کرکے اکڑ گئی ۔۔۔۔۔ اب میں نے ارادہ کر لیا جس دن سی این جی بند ہوگی اس دن کھانا رات میں ہی بنا لوں گی ۔۔۔۔۔۔۔ منحوس حکمراں گیس پی گئے ۔۔۔۔۔ بجلی کھا گئے ۔۔۔۔۔۔ پاکستان میں کچھ بچا ہی نہیں عوام کے سِوا ۔۔۔۔۔۔۔

خزاں کا شوخ رنگ موسم ۔۔۔ گلابی سردیاں اور ماہِ دسمبر ۔۔۔۔۔۔۔۔ اداس ، خاموش لیکن رمانوی موسم ہے آج کل ۔۔۔۔۔۔۔ ہر طرف زرد ، نارنجی ، سرخ پتے بکھرے ہیں ۔۔۔۔۔ فضا میں خشک پتّوں کی خوشبو پھیلی ہے ۔۔۔۔۔۔۔ دسمبر کی آمد کے ساتھ دل چاہتا ہے بارش ہو اور گلابی سردیاں شوخ گلابی رنگ میں بدل جائیں ۔۔۔۔۔۔ لیکن بادل آئے اور چند بوند برسا کے سردی بھی ساتھ لے گئے ۔۔۔۔
سردیاں آئیں نا آئیں دسمبر تو ہے ۔۔۔۔ اس مہینے سے مجھے دلچسپی ہے لیکن کیوں ۔۔۔۔ جبکہ کچھ سالوں سے دسمبر خوشگوار نہیں گزرا ۔۔۔۔۔۔۔ یہ سوال خود سے پوچھا تو جواب تسلّی بخش نہیں ملا لیکن پھر بھی شائد اس لیئے کہ سردی کا موسم پسند ہے اور دسمبر پر لکھی گئی شاعری بھی ۔۔۔۔۔۔ دسمبر کی زرد دھوپ ہو یا زرد ہالے میں چمکتا چاند دونوں خوبصورت لگتے ہیں ۔۔۔۔۔ نیو ایئر کارڈز تو اب خواب و خیال ہوئے لیکن نئے سال کے کلینڈر ۔۔۔ ڈائری ۔۔ کشمیری چائے ۔۔۔ بلیک کافی ۔۔۔ میتھی اور تِل کے لڈو ۔۔۔ ڈرائی فروٹس اور خاص کر نزلہ زکام سردی کی سوغاتیں ہیں ۔۔۔۔۔ ویسے نزلے میں آواز رومینٹک ہو جاتی ہے ، جس کی سماعت حسین ہو اس سے پوچھ لیں بے شک
دسمبر کی دھوپ میں بیٹھ کر اپنا ایک شوق بارہا پورا کیا میں نے پھر اکتا گئی تو چھوڑ دیا ۔۔۔۔۔۔۔ اس بار پھر شوق ہوا ہے اون کے گولے منگوائے ہیں ایک شال ہی بُن لوں ۔۔۔۔۔۔۔ کیا پتہ اگلے سال یہ فرصتیں ملیں نہ ملیں ۔۔۔۔

ایک تالاب میں بہت سے مینڈک رہتے تھے ۔۔۔ سب کی آپس میں بہت دوستی تھی ۔۔۔ ہر کوئی کسی نا کسی کام میں مہارت رکھتا تھا ۔۔۔۔ ان میں سے ایک کو خود پہ بہت غرور تھا کہ اگر وہ اُن سب کے درمیان نہ ہو ۔۔۔ اندھیری رات میں اپنی بلند آواز سے سب کو گانے نہ سنائے تو رات گزارنا مشکل ہو ۔۔۔ لیکن کوئی اس کی قدر نہیں کرتا تھا ۔۔۔۔ وہ کہتا دیکھنا میں یہاں سے چلا جاؤں گا تو تم سب مجھے یاد کرو گے میرے بغیر تم سب کچھ نہیں ۔۔۔۔۔ ایک دن جب بارش ہو رہی تھی وہ پھدّکتا ہوا خود کو دیکھ کے خوش ہوتا رہا کہ کتنا اچھا ڈانس کرتا ہوں میں سب مجھ سے جلتے ہیں ۔۔۔۔ خوشی میں جھومتا وہ راستہ بھٹک گیا ۔۔۔ ایک جگہ بارش کا پانی جمع دیکھ کر وہاں رکا کہ شائد رہنے کی جگہ مل جائے لیکن شریر بچّوں نے اتنے پتھر مارے کہ بیچارہ گھبرا کے بھاگا ۔۔۔۔۔۔۔ وہ بہت پریشان تھا اپنے ساتھیوں کے پاس جانے کے لیئے لیکن ہر راستہ نا معلوم سمت جا نکلتا تھا ۔۔۔۔۔۔ اس کا خیال تھا سب اس کو تلاش کر رہے ہونگے لیکن یہ اس کی خوش فہمی تھی ۔۔۔۔۔ دوسری طرف اس تالاب کے مینڈک اپنے ساتھی کو اپنے درمیان نہ دیکھ کر بہت خوش تھے ۔۔۔ وہ سب اس کی یہ بات سُن سُن کر تنگ آ چکے تھے کہ اس کے بغیر زندگی ناممکل اور بیکار ہے وہ ہے تو سب کچھ ہے ۔۔۔۔۔۔۔
وہ سب اس کے بغیر اب بھی مکمل تھے ۔۔۔۔۔۔۔ لیکن اس خوش فہم کی سوچ اب بھی وہی تھی ۔۔۔۔۔۔۔ خوش فہمی اور خود ستائشی کی عادت نفسیاتی مرض ہے اس کا علاج ضروری ہے تاکہ ایسا شخص صحیح سمت سوچنے سمجھنے کے قابل ہوسکے اور دوسروں کی زندگی عذاب نہ ہو ۔۔۔