افففففف یہ شور ۔۔۔۔۔۔۔۔

{ اکتوبر 27, 2011 @ 1:07 صبح } · { حجاب کی باتیں }

رات بھر نیند نہ آئے ۔۔۔۔۔۔۔۔ وجہ چاہے کوئی پریشانی ہو یا مچھروں نے ستایا ہو ۔۔۔۔۔ صبح کے وقت چڑیوں کی چہچہاہٹ سن کر طبعیت فریش زندگی خوبصورت لگنے لگتی ہے ۔۔۔۔۔ جیسے جیسے وقت گزرتا ہے پرندوں کی آوازیں غائب ۔۔۔۔۔۔۔۔ دوڑتی بھاگتی زندگی کا شور شروع ۔۔۔۔۔۔۔ رکشہ ۔۔۔ ٹیکسی ۔۔۔ بس کے پریشر ہارنز ۔۔۔ گلی گلی آواز لگا کر چیزیں فروخت کرنے کی آوازیں ۔۔۔۔۔ بچوں کی چیخ و پکار ۔۔۔۔۔۔۔۔ کبھی کبھی پڑوسنوں کی لڑائی ۔۔۔۔۔۔۔ چیختا ہوا فون ۔۔۔۔۔ ہر منٹ بعد ایس ایم ایس آمد کی ٹون ۔۔۔۔۔ ٹی وی کی بلند آواز ۔۔۔۔۔۔۔ اختلاجِ دماغ و قلب میں مبتلا کرنے والے بے سُرے گانے ۔۔۔۔۔۔ اُففففف کتنا شور ہے ۔۔۔۔۔
شور کی تعریف کرنا مشکل کام ہے ۔۔۔۔ میں جن آوازوں اور میوزک کے شور کو ناپسند کرتی ہوں دوسرے اُس سے لطف اندوز ہوتے ہیں ۔۔۔۔ اِرد گِرد کے ماحول میں شور کی وجہ سے تیز آواز میں چیخ کر ایک دوسرے کو مخاطب کرکے بات کرنا ، اور آہستہ آہستہ آواز کا والیوم مزید بڑھاتے جانا سب کی عادت بن چکی ہے ۔۔۔۔۔۔ دھیمی آواز یا تو سُنی نہیں جاتی اور سُن لی جائے تو سمجھ نہیں آتی ۔۔۔۔۔۔۔۔ پھر ہوتی ہے تو تو میں میں کہ کب سے آواز دی جارہی ہے بہری ہو کیا ۔۔۔۔۔۔۔۔
ماہرینِ نفسیات کہتے ہیں پُر شور علاقوں میں رہنے والے لوگوں کے مزاج جارحانہ اور وہاں جرائم کی شرح زیادہ ہوتی ہے ۔۔۔۔۔ شور سے معدے کا نظام متاثر ۔۔۔۔۔ طبعیت میں گھبراہٹ اور بے چینی رہتی ہے ۔۔۔۔۔۔
کبھی کبھی اس پُر شور ماحول سے گھبرا کر دل چاہتا ہے ایسی جگہ چلی جاؤں جہاں خاموشی اور سکون کے ساتھ ۔۔۔۔۔۔۔۔ پرندوں کی چہچہاہٹ ۔۔۔۔۔ ہوا اور درخت سے گرتے ہوئے خشک پتوں کے شور کے سوا کچھ نہ ہو ۔۔۔۔۔۔۔۔۔ مجھ پہ پتّے گرتے رہیں اور میں سوکھے ہوئے پتّوں کا کچومر بناتی رہوں ۔۔۔۔۔۔۔۔۔ اچانک سر پر کچھ محسوس ہو ہاتھ پھیر کے پتہ کرنے پہ کوّے کی لیس دار بیٹ ہاتھ پہ لگے اور آنکھ کُھل جائے ۔۔۔۔۔۔۔۔۔ میں اپنے کمرے میں 😦