تحفہ —

{ ستمبر 8, 2010 @ 1:25 صبح } · { حجاب کی باتیں }

کچھ عرصہ پہلے تک مجھے تحفہ دینا بہت اچھا لگتا تھا اس لیئے کہ تحفہ جتنا بھی کم قیمت یا چھوٹا سا بھی ہوتا تھا لوگ خوشی سے لینا پسند کرتے تھے خوشی چہرے سے ظاہر ہوتی تھی بلکہ تبصرہ بھی فرمایا جاتا تھا ۔۔ مگر آج کل جب لوگ مہنگائی کے مارے ہوئے ہیں سب کی توقع زیادہ تر یہی ہوتی ہے کہ کوئی قیمتی نایاب سا تحفہ ہو اور بڑا سا گفٹ پیک ہو ۔۔ چھوٹے گفٹ پیک اگر کسی کو پکڑاؤ کسی تقریب میں ، چاہے اُس کی قیمیت زیادہ ہی کیوں نہ ہو یوں منہ بنا کہ لیا جاتا ہے جیسے کسی مہلک بیماری کے جراثیم پیک کرکے دئیے جا رہے ہوں 😛 اور بڑا پیک دیکھ کر باچھیں کِھل جاتی ہیں ۔۔ میں نے خود دیکھا ہے سچّی مچّی ۔۔ ویسے میری فرینڈز ایسا نہیں کرتیں اس لیئے کہ میں تحفہ دیتی ہی نہیں 😛
تحفہ لینا بھی اچھا لگتا ہے خوشی ہوتی ہے اور میں تحائف سنبھال کر رکھتی ہوں چاہے وہ چھوٹا یا کم قیمت کا ہی کیوں نہ ہو ، میرے پاس میری اسکول اور کالج فرینڈز کے بے شمار تحائف ۔۔ ہیئر بینڈز ، بُندے ، چوڑیاں ، پرس ، ڈائری ، ڈوپٹے ، عید کارڈز اور ایک پانچ روپے کا نوٹ بطور یادگار موجود ہیں ،کچھ چیزیں میں اب بھی استعمال کرتی ہوں اور فرینڈز کو یاد کرتی ہوں یا فون کرکے باتیں شیئر کرتی ہوں ۔۔ میری ایک اسکول فرینڈ جو اب اس دنیا میں نہیں اُس کا دیا ہوا ایک عید گفٹ چھوٹا سا ریڈ کلر کا چاند بنا ہوا بُندہ اور اس پہ سفید نگ کا تارہ مجھے بے حد عزیز ہے ۔۔ اب سب کو تحفے دینا چھوڑ دیئے صرف ایک فرینڈ کو دیتی اور وصول کرتی ہوں 🙂
مجھے تو یہی سارے تحفے خاص لگتے ہیں جو خلوص کے جذبے سے مجھے دیئے گئے ۔۔ چاہے عید پر ملیں یا کسی اور موقع پر ۔۔ آپ سب تحفے لیتے زیادہ ہیں یا دیتے زیادہ ہیں ؟؟ کوئی ایسی چاند رات آئی جب کوئی خاص تحفہ ملا ہو اور یہ کہنے کو دل چاہا ہو کہ ۔۔ پیار کا تحفہ تیرا بنا ہے جیون میرا 😛 یا آپ نے کسی کو ایسا کوئی تحفہ دیا کہ کسی اور کا جیون بن گیا ہو 🙂 آخری تحفہ کیا ملا ؟؟ مجھے آخری تحفہ پچھلے ماہ ملا ہے ۔۔ جس میں گھڑی ، پرس اور بہت ساری چاکلیٹس ۔۔ ابھی چاند رات میں ایک دن باقی ہے جس جس کو تحفے دینا ہیں دے لیں اس لیئے کہ بقول شاعر
اِک پیار بھرا تحفہ
بروقت اگر پہنچے
ہر چیز سے بہتر ہے
جذبوں کی مہک اس میں
چاہت کی دھنک اس میں
خوابوں کی طرح دلکش
کرنوں کی طرح روشن
اِک پیار بھرا تحفہ
روٹھے ہوئے لوگوں کو
بھیگی ہوئی پلکوں کو
ٹوٹے ہوئے رشتوں کو
تجدیدِ تعلق کا
پیغام سناتا ہے
اِک پیار بھرا تحفہ
بروقت اگر پہنچے
بھولی ہوئی یادوں کا
گزرے ہوئے سپنوں کا
جذبات کی موجوں سے
طوفان اٹھاتا ہے
اِک پیار بھرا تحفہ ( خلیل اللہ فاروقی )